Жисмоний шахснинг Ўзбекистон Республикасининг прoфессионал ва олий таълим ташкилотларида таълим олиш (ўзининг, шунингдек, 26 ёшга тўлмаган фарзандларининг ёки эрининг (хотинининг) таълим олиши) учун тўлов қилишга йўналтириладиган, солиқ солиниши лозим бўлган иш ҳақи ва бошқа даромадларига ЖШДС солинмайди (СК 378-м. 16-б.).

Имтиёзни қўллаш тартиби Ўзбекистон Республикаси олий ўқув юртларида таълим олиш учун йўналтириладиган маблағларга жисмоний шахслардан олинадиган даромад солиғи бўйича имтиёзни қўллаш тартиби тўғрисидаги Низомга мувофиқ тасдиқланган (АВда 2010 йил 27 майда №2107-сон билан рўйхатга олинган қарорга илова).

Имтиёзни қўллаш мақсадида олий ўқув юрти деганда олий таълимнинг таълим дастурларини (бакалавриат ва магистратура) амалга оширадиган Ўзбекистон Республикасининг олий таълим муассасалари, ҳамда Ўзбекистонда аккредитациядан ўтган бир қатор хорижий олий таълим муассасалари тушунилади.

Ходим 26 ёшга тўлмаган фарзандининг олий ўқув юртида ўқиши учун тижорат банкидан таълим кредитини олган бўлса, ҳамда кредитни қоплаш учун иш берувчи ходимнинг иш ҳақи ва бошқа даромадлари ҳисобидан банкка тўлов қилиб борса, иш берувчи тўлов манбаида ЖШДС бўйича солиқ имтиёзини қўллаши мумкин (Низомнинг 10-банди).

Ходим имтиёзни қўллаш учун иш берувчига даромадларини ўқиш учун тўловга (кредитни қоплашга) ўтказиш тўғрисидаги аризани қуйидаги ҳужжатларни илова қилган ҳолда тақдим этади (Низомнинг 11-банди):

• талаба билан Ўзбекистон Республикаси олий ўқув юрти ўртасида тўловли-контракт асосида ўқитиш тўғрисида тузилган шартнома нусхаси;
• тижорат банки билан таълим кредитини олиш учун тузилган шартнома нусхаси;
• таълим олувчининг паспорти ва (ёки) туғилганлик тўғрисидаги гувоҳномаси нусхаси.