2.12.2017 йилдаги ПҚ-3422-сон билан берилган сиз назарда тутаётган имтиёзлар қуйидаги таҳрирда берилган:

«Йиллик тушумида халқаро юк ташиш хизматлари экспорти улуши 50 ва ундан юқори фоизни ташкил этадиган миллий автотранспорт корхоналари ва товарларни ташишни ташкил этиш, омборга жойлаштириш, сақлаш, ишлов бериш ва тарқатиш билан шуғулланувчи транспорт-логистика компаниялари:

2022 йилнинг 1 январига қадар бўшаган маблағлар ўзининг автотранспорт воситалари паркини кенгайтиришга, ишлаб чиқариш қувватларини модернизациялашга, замонавий омборхона терминаллари барпо этишга ва банк кредитларини тўлашга йўналтирилиши шарти билан мол-мулк солиғи ва ер солиғи тўлашдан озод қилинсин;

2024 йилнинг 1 январига қадар Ўзбекистон Республикасида ишлаб чиқарилмайдиган, транспорт-логистика хизматлари кўрсатишга мўлжалланган, белгиланган тартибда тасдиқланадиган рўйхатлар бўйича олиб кириладиган омборхона ускуналари, юк ортиш-тушириш техникаси, агрегатлар, эҳтиёт қисмлар ва бошқа товарлар учун божхона тўловлари (қўшилган қиймат солиғи ва божхона расмийлаштируви йиғимларидан ташқари) тўлашдан озод қилинсин».

Яъни 2022 йилгача қадар ҳам мол-мулк солиғи ва ер солиғи тўлашдан озод қилиш кўринишидаги имтиёзни ҳамма юк ташувчи корхоналар қўллай олмаган. Имтиёзни қўллаш учун корхоналар йиллик тушумида халқаро юк ташиш хизматлари экспорти улуши 50 ва ундан юқори фоизни ташкил этадиган миллий автотранспорт корхоналари ва товарларни ташишни ташкил этиш, омборга жойлаштириш, сақлаш, ишлов бериш ва тарқатиш билан шуғулланувчи транспорт-логистика компаниялари бўлиши лозим эди.

Агар корхонангиз ушбу талабларга жавоб берса, имтиёзни қўллашга ҳақли бўлган. Солиқ имтиёзи бўшаган маблағлар мақсадли йўналтирилиши шарти билан берилган. Агар корхонада солиқ имтиёзлари натижасида бўшаган маблағларнинг 2022 йил 1 январга қадар мақсадли йўналтирилмай қолган қисми мавжуд бўлса, уларни Президент қарорида кўрсатилган мақсадларга 2023 йил 1 январгача йўналтириши мумкин (СК 75-м. 7-қ.).

ПҚ-3422 бўйича имтиёз муддати узайтирилмаган. Ҳозирда юк ташиш билан шуғулланувчи корхоналарга ер солиғи ва мол-мулк солиғи бўйича алоҳида имтиёзлар берилмаган.