Қонунчиликда ходимлар сонидан келиб чиққан ҳолда тадбиркорлик субъектлари микрофирмалар, кичик корхоналар, ўрта корхоналар ва йирик корхоналарга бўлинади.
Шифохона муассасалари фаолияти, умумий шифокорлик амалиёти соҳасидаги фаолият, махсус шифокорлик амалиёти соҳасидаги фаолият билан шуғулланувчи ташкилотлар учун ходимларнинг йиллик ўртача сони 100 кишини ташкил этади (Вазирлар Маҳкамасининг 24.08.2016 й. 275-сон «Иқтисодий фаолият турларини таснифлашнинг халқаро тизимига ўтиш чора-тадбирлари тўғрисида»ги Қарорига 1-илова).
Шу билан бирга, микрофирмалар ва кичик корхоналар томонидан республиканинг академик лицейлари, профессионал ва олий таълим муассасалари битирувчилари билан меҳнат шартномалари тузилганда, банд ходимларнинг ўртача йиллик сони қонун ҳужжатларида белгиланган чекланган нормативдан кўпи билан 50 фоиз оширилган ҳолларда микрофирмалар ва кичик корхоналар учун назарда тутилган имтиёзлар, кафолатлар ва ҳуқуқлар уларда сақланиб қолади. Бунда имтиёзлар Ўзбекистон Республикаси таълим муассасалари битирувчиларининг ўқишни якунлаган кунидан бошлаб уч йилдан ортиқ вақт ўтмаган тақдирдагина тақдим қилинади (ПФ-4232-cон Фармоннинг 1-банди).
Демак, кўрсатилган фаолият билан шуғулланувчи ташкилотлар Ўзбекистон Республикаси таълим муассасаларининг 50 тагача битирувчиларини (битиргандан сўнг уч йил ичида) меҳнат шартномаси асосида жалб қилиши мумкин ва бунда кичик тадбиркорлик субъекти мақоми сақланиб қолади.
Жавоблар улар эълон қилинган санада долзарб ҳисобланади.