Қонунчиликда корхона раҳбарини мукофотлаш, унга бошқа тўловларни тўлаш тартиби, шунингдек бунинг учун юқори ташкилотдан рухсат олиш лозимлиги ёки лозим эмаслиги алоҳида белгиланмаган. Меҳнат ҳақи шакли ва тизимлари, мукофотлар, қўшимча тўловлар, устамалар, рағбатлантириш тарзидаги тўловлар жамоа шартномаларида, шунингдек иш берувчи томонидан касаба уюшмаси қўмитаси ёки ходимларнинг бошқа вакиллик органи билан келишиб қабул қилинадиган бошқа локал ҳужжатларда белгиланади (МК 153-м.). Шунга кўра, агар корхонанинг локал ҳужжатларида (корхона устави, бошқарув органи тўғрисидаги низом, жамоа шартномаси ва ҳ.к.) ёки юқори турувчи ташкилотнинг алоҳида буйруқ ёки кўрсатмасида директорни (раҳбарни) мукофотлаш бўйича алоҳида тартиб ўрнатилган бўлмаса, корхонадаги локал ҳужжатлар асосида барча ходимлар қатори директорни ҳам мукофотлаш мумкин.