Ушбу савол бўйича турли фикрлар бўлиши мумкин. Чунки бу масала «Меҳнат кодексини тасдиқлаш тўғрисида»ги Қонунда аниқлаштирилмаган.
Бир фикрга кўра, таътил кунлари қуйидагича ҳисобланиши керак. Мисол учун: 2022 йил 1 ноябрда ишга қабул қилинган ходим 2023 йил 5 июндан таътилга чиқади. Бунда 2022 йил 1 ноябрдан 2023 йил 30 апрелгача бўлган давр учун таътил 15 иш кунидан келиб чиқиб ҳисобланади:
15 : 12 × 6 = 7,5 иш куни (8,5 календарь кунга тенг).
2023 йил 1 майдан 31 октябргача бўлган давр учун таътил 21 календарь кундан келиб чиқиб ҳисобланади:
21 : 12 × 6 = 10,5 календарь кун.
Иш йили учун таътилни жамлаймиз:
8,5 + 10,5 = 19 календарь кун.
Шундай қилиб, ходимнинг таътили 2023 йил 23 июнда тугайди. Агар ташкилотда 5 кунлик иш ҳафтаси белгиланган бўлса, ходим 26 июнь куни, агар 6 кунлик бўлса, 24 июнь куни ишга чиқади.
Бошқа фикрга асосан, ходимга меҳнат таътили 1 майдан кейин берилса, иш йилининг бир қисми янги МК кучга киргунгача бўлган даврга тўғри келишидан қатъи назар, таътил янги МКда кўрсатилган тартибда берилади. Чунки янги МК бўйича энг кам таътил 21 календарь кундан кам бўлиши мумкин эмас.
Ходим билан меҳнат шартномаси 1 майда бекор қилинганда барча ишлатилмаган таътиллар учун компенсация тўлаш ҳам ҳудди шундай тўланади (яъни 21 календарь кун учун).
Фикрлар турлича эканлигини инобатга олиб, ушбу вазиятда Меҳнат вазирлигининг расмий тушунтириш хатини олиш лозим, деб ўйлаймиз.
Жавоблар улар эълон қилинган санада долзарб ҳисобланади.