Меҳнат кодексининг 220-моддасига кўра, ходимга у битта ташкилотда ёки тармоқда ишлаган ҳар беш йил учун давомийлиги икки календарь кун бўлган, бироқ жами саккиз календарь кундан кўп бўлмаган ҳар йилги қўшимча меҳнат таътили берилади. Ходимнинг иш йилининг бир қисми 2023 йил 30 апрелгача (янги Меҳнат кодекси кучга киргунча), қолган қисми 30 апрелдан кейинга тўғри келганда стаж учун қўшимча таътил қай тарзда берилиши «Меҳнат кодексини тасдиқлаш тўғрисида»ги Қонунда кўрсатилмаган.

Ушбу савол бўйича турли фикрлар бўлиши мумкин. Бир томондан, асосий меҳнат таътили янги Меҳнат кодекси кучга киргунга қадар бериб бўлинган. Стаж учун қўшимча таътил, одатда, асосий таътил билан бирга берилади. Шунга асосан, стаж учун таътилни бериш кейинги асосий таътилни бериш билан бирга бошланиши керак. Бошқа томондан, асосий таътил берилаётган даврнинг бир қисми 30 апрелдан кейинга тўғри келаётганлиги учун ходим стаж учун қўшимча таътил олишга ҳақли (турли фикрларга кўра, ўша даврга мутаносиб равишда ёки тўлиқ). Шунга биноан, олдинроқ асосий таътилни олган ходимга стаж учун қўшимча таътил бериш мумкин.

Ушбу вазиятда Меҳнат вазирлигининг расмий тушунтириш хатини олиш лозим, деб ўйлаймиз.