Корхонада штатлар ўзгарганда иш берувчи меҳнат шартномасини бекор қилиш нияти ҳақида ходимни камида икки ой олдин ёзма шаклда (имзо қўйдириб) огоҳлантириши шарт. Иш берувчи ходимни огоҳлантириш муддатини пулли компенсация билан алмаштиришга ҳақлидир (МК 165-м.). Бундай огоҳлантириш ва огоҳлантириш муддатини пулли компенсация билан алмаштириш ўриндошларга ҳам тегишли.

Ходимнинг айбли ҳаракатлари (ҳаракатсизлиги) билан боғлиқ асослар бўйича бекор қилингандан ташқари қолган барча ҳолларда иш берувчининг ташаббуси билан меҳнат шартномаси бекор қилинганда ходимга ишдан бўшатиш нафақаси тўланади (МК 173-м.). Ўриндошлик (ички ёки ташқи) асосида ишлаш тўғрисидаги меҳнат шартномаси юқоридаги асос бўйича бекор қилинганда ходимга ишдан бўшатиш нафақаси икки ҳафталик ўртача иш ҳақи миқдорида тўланади (МК 442-м.).