Олий таълим муассасаларида ўқув машғулотларини ўтказганлик учун меҳнатга соатбай ҳақ тўлаш миқдорлари «Ўқув машғулотларини ўтказганлик учун меҳнатга соатбай ҳақ тўлаш миқдорларини тасдиқлаш тўғрисида»ги қарорнинг (АВда 22.04.2019 йил 3157-сон билан рўйхатга олинган) иловасида белгиланган. Унда меҳнатга соатбай ҳақ тўлаш миқдори базавий лавозим маошларига нисбатан фоизларда белгиланган. Базавий лавозим маошлари миқдори ВМнинг 01.08.2008 йилдаги 164-сон қарори билан тасдиқланган (1-илова). Юқорида кўрсатиб ўтилган ҳақ тўлаш миқдорлари давлат ОТМларида қўлланилади. Нодавлат ўқув ташкилотлари иш ҳақи миқдорларини ўзлари белгилашга ҳақли.

Олий таълим муассасаси профессор-ўқитувчилар таркибининг ўқув юкламаси Олий таълим муассасаси профессор-ўқитувчилар таркибининг ўқув юкламаси ҳамда ўқув-услубий, илмий-тадқиқот ва «устоз-шогирд» ишларини белгилаш қоидаларида белгиланган (АВда 08.10.2018 йил 3076-сон билан рўйхатга олинган). Қоидаларга мувофиқ маъруза машғулотлари илмий унвон ва илмий даражага эга бўлган профессор-ўқитувчилар томонидан ўтказилади. Зарур ҳолларда (маъруза машғулотлари ҳажми кўп бўлганда ёки профессор, доцент ва катта ўқитувчилар етарли бўлмаганда) олий таълим муассасаси Кенгашининг қарорига асосан илмий унвон ва илмий даражаси бўлмаган ўқитувчилар ҳам маъруза машғулотларини ўтиши мумкин. Бироқ бундай ўқитувчилар 3 йиллик илмий-педагогик иш стажига эга бўлиши керак ва улар бир ўқув йилида 250 соатгача ҳажмда маъруза машғулотларини ўтишга ҳақли. Профессор-ўқитувчиларнинг ўқув (маъруза, амалий (якка), семинар ва лаборатория) соатлари нормаси йилига 400 соатдан кам бўлмаслиги тавсия этилади (Қоидаларнинг 8-б.). Олий таълим муассасаси профессор-ўқитувчиларининг ўқув юкламаси ҳажмини ҳисоблашнинг вақт меъёрлари Қоидаларнинг 1-иловасида кўрсатиб ўтилган.

Штатдаги ўқитувчилар соатбай дарс ўтиши, нормалари ва соатбай ҳақ тўлаш миқдорлари корхонанинг ички ҳужжатларида (низом, буйруқ, йўриқнома) ва/ёки  меҳнат шартномасида белгиланади.

Таклиф қилинган ўқитувчилар билан Меҳнат кодексида ўрнатилган тартибда меҳнат шартномаси тузилади. Олий таълим ташкилотларига соатбай ҳақ тўланиши шартлари асосида ўқитувчилик ишига кираётган шахслар танловсиз, олий таълим ташкилоти раҳбарининг буйруғи билан ишга қабул қилинади (МК 501-м.).