Иш берувчи ходимларни моддий рағбатлантиришга ҳақли. Қонунчилик ҳужжатларида тижорат ташкилотлари ходимларини мукофотлаш ва моддий ёрдам тўлаш бўйича бирор-бир чекловлар мавжуд эмас.
Байрам муносабати билан бериладиган рағбатлантириш тўловлари, қишлоқ хўжалиги маҳсулотларини харид қилиш учун моддий ёрдам тўловлари меҳнатга ҳақ тўлаш тизимида назарда тутилмаган рағбатлантирувчи мукофотлар турига киради (МК 252-м. 3-қ.). Рағбатлантирувчи хусусиятга эга қўшимча тўловлар ва устамалар тизимлари ҳамда мукофотлаш тизимлари жамоа келишувларида, жамоа шартномасида, шунингдек иш берувчи томонидан касаба уюшмаси қўмитаси билан келишувга кўра қабул қилинадиган ички ҳужжатларда, меҳнат тўғрисидаги қонунчиликка мувофиқ меҳнат шартномасида белгиланади. Меҳнатга ҳақ тўлаш миқдори бирор-бир энг кўп миқдор билан чекланмайди (МК 246м.).
Юқоридагиларга асосан корхоналар ўз фаолиятининг хусусиятлари ва молиявий ҳолатини ҳисобга олган ҳолда, бундай тўловларни тўлашни мустақил равишда ишлаб чиқиш ва қўллашга ҳақли.
Тўловларни белгилашда ҳомиладорлик ва туғиш таътилида бўлган аёлларни бошқа вақтинча меҳнатга лаёқатсиз бўлган ходимлар билан тенг кўришни тавсия қилган бўлардик. Чунки ҳомиладорлик ва туғиш таътилида бўлган аёл ҳам, вақтинча меҳнатга лаёқатсиз бўлган ходим ҳам вақтинча меҳнатга лаёқатсизлик варақаси асосида ишламай туради.
Жавоблар улар эълон қилинган санада долзарб ҳисобланади.