Саволда ходимнинг иш йили кўрсатиб ўтилмаган. Иш йили деганда ходимнинг ўн икки ойга тенг бўлган ва ҳақиқатда иш бошланган санадан эътиборан ҳисоблаб чиқариладиган иш даври тушунилади. Агар иш йилига киритиладиган даврларнинг суммаси тўлиқ ўн икки календарь ойдан кам бўлса, ходимнинг иш йили етишмаётган вақтга сурилади (МК 225-м.). Мисол учун, ходим 02.01.2021 йилда ишга кирган бўлса, унинг иш йили ҳар сафар 2 январдан бошланиб кейинги йилнинг 1 январигача бўлади (биринчи иш йили - 02.01.2021 йилдан 01.01.2022 йилгача, кейинги иш йили - 02.01.2022 йилдан 01.01.2023 йилгача ва ҳ.к.).

Ҳар йилги асосий ва қўшимча меҳнат таътилини олиш ҳуқуқини берувчи иш стажи жумласига иш йили давомида ҳақиқатда ишланган вақт, ходим ҳақиқатда ишламаган, лекин унинг иш ўрни (лавозими) сақланган вақт, шу жумладан ҳар йилги меҳнат таътили вақти, дам олиш кунлари, ишланмайдиган байрам кунлари ҳамда қонунчиликда белгиланган бошқа даврлари киради. Ҳар йилги асосий меҳнат таътилини олиш ҳуқуқини берадиган иш стажи болани парваришлаш учун бериладиган таътиллар вақти киритилмайди (МК 226-м.). Дейлик ходимнинг иш йили 01.01.2023 йилдан бошланган. Саволга кўра, ходим  30.06.2023 йилгача ишлаб, меҳнатга лаёқатсизлик варақаси асосида 126 кунлик ҳомиладорлик ва туғиш таътилига чиққан (бу давр ҳам меҳнат таътилини олиш ҳуқуқини берадиган иш стажига киради). Шундан келиб чиқиб, 03.11.2023 йилгача бўлган даврдаги меҳнат таътилини олиш ҳуқуқини берадиган иш стажига киради. Болани парваришлаш таътили меҳнат стажига кирмаслиги сабабли ходим тўлиқ иш йилигача 59 кун ишлаб бермаган ва унинг иш йили шу 59 кунга сурилиши керак. Агар ҳозир ходим болани парваришлаш таътилини тўхтатиб, ишга тушса ёки меҳнат таътилини олмоқчи бўлса, унга тўлиқ 29 календарь кундан иборат таътилни берса бўлади. Бунда ходимнинг корхонага 56 кун ишлаб бериш қарзи бўлади.

Ходимга меҳнат таътили даврига ўртача иш ҳақи сақланиб колади. Ўртача иш ҳақини ҳисоблаш МКнинг 257-моддасида кўрсатиб ўтилган.