Интизомий жазонинг амал қилиш муддати ичида ходимга нисбатан рағбатлантириш чоралари, шу жумладан меҳнатга ҳақ тўлаш тизимига кирмайдиган ва меҳнат натижаларига асосланмаган мукофотлар ҳам (байрамлар, шу жумладан касб байрамлари, юбилейлар муносабати билан ва ҳоказолар) қўлланилмайди (МК 299-м.). Шунга асосан:

- биринчидан, агар чораклик моддий рағбатлантириш ҳақ тўлаш тизимига кирадиган ва/ёки меҳнат натижаларига асосланган мукофот бўлса, бундай рағбатлантириш интизомий жазо қўлланилганидан қатъи назар тўлаб берилиши керак;

- иккинчидан, интизомий жазо интизомий қилмиш аниқланганидан кейин қўлланилади. Хизмат текшируви натижалари тўғрисидаги далолатнома комиссия томонидан имзоланган кун хизмат текшируви натижалари бўйича аниқланган интизомий қилмиш аниқланган кун деб ҳисобланади (МК 314-м.). Меҳнат қонунчилигида хизмат текшируви даврида рағбатлантириш чоралари қўлланилмаслиги кўзда тутилмаган.