I. Иш берувчи ходимларга қонунчиликда кафолатланган таътилларни бериши шарт (МКнинг 214-м.).

Ҳар йилги меҳнат таътили дам олиш ва ишлаш қобилиятини тиклаш учун иш ўрни (лавозими) ҳамда ўртача иш ҳақи сақлаб қолинган ҳолда ходим ишдан озод этиладиган, ходимга ҳар йили иш йили давомида бериладиган вақт давридир.

Барча ходимлар, шу жумладан ўриндошлик асосида ишлайдиган ходимлар ҳар йилги меҳнат таътилига чиқиш ҳуқуқига эга (МКнинг 216-м.).

Шундан келиб чиққан ҳолда иш берувчи Сизга йиллар давомида фойдаланилмаган меҳнат таътилини бир вақтнинг ўзида (кетма-кет) бериши мумкин.

II. Ўзаро яқин қариндош ёки қуда томондан қариндош бўлган шахсларнинг (ота-она, ака-укалар, опа-сингиллар, ўғиллар, қизлар, эр-хотин, шунингдек эр-хотиннинг ота-онаси, ака-укалари, опа-сингиллари ва фарзандлари) айнан битта давлат ташкилотида бирга хизмат қилиши, агар уларнинг бирга хизмат қилиши улардан бирининг иккинчисига бевосита бўйсунишига ёки унинг назорати остида бўлишига боғлиқ бўлса тақиқланади (МКнинг 121-м.).

Яъни агар Сизнинг иш жойингиз давлат ташкилоти бўлса ва юқорида кўрсатилган қариндошларингиз билан бевосита бўйсунув ёки назорат остида бўлиш ҳолати мавжуд бўлса, бирга ишлаш тақиқланади.

Мазкур ҳолат декабрь ойида кучга кирадиган “Манфаатлар тўқнашуви тўғрисида”ги Қонун нормалари билан ҳам  тасдиқланади.

Манфаатлар тўқнашуви - шахснинг шахсий (бевосита ёки билвосита) манфаатдорлиги унинг ўз лавозим ёки хизмат мажбуриятларини лозим даражада бажаришига таъсир кўрсатаётган ёхуд таъсир кўрсатиши мумкин бўлган ҳамда шахсий манфаатдорлик билан фуқароларнинг, ташкилотларнинг, жамиятнинг ёки давлатнинг ҳуқуқлари, қонуний манфаатлари ўртасида қарама-қаршилик юзага келаётган (мавжуд манфаатлар тўқнашуви) ёки юзага келиши мумкин бўлган (эҳтимолий манфаатлар тўқнашуви) вазият (Қонуннинг 3-м.).

Жумладан, Қонуннинг амал қилиши давлат органларига ва маҳаллий давлат ҳокимияти органларига, давлат муассасаларига, давлат унитар корхоналарига, давлат мақсадли жамғармаларига, шунингдек устав фондида (устав капиталида) давлат улуши 50 фоиз миқдорда ва ундан ортиқ бўлган акциядорлик жамиятларига нисбатан татбиқ этилади (Қонуннинг 1-м. 2-қ.).

Давлат органининг ёки бошқа ташкилотнинг ходими лавозим мажбуриятларини ёки хизмат ваколатларини бажариш чоғида манфаатлар тўқнашувига олиб келадиган ёки олиб келиши мумкин бўлган шахсий манфаатдорликка йўл қўймаслиги шарт (Қонуннинг 6-м.1-қ.).

Шунга кўра, Сизда юзага келган вазиятда юқоридаги ҳолатлар мавжуд бўлмаса, қариндошларингиз билан биргаликда ишлашингиз мумкин.