Калава ипдан даваль хом ашёси сифатида қайта ишланиб тайёрланган хом бўз корхонанинг ўзи ишлаб чиқарган маҳсулоти ҳисобланади, чунки калава ип маҳсулоти корхона томонидан ип толасидан ишлаб чиқарилган.
“Эркин алмаштириладиган валютага экспорт қилишда имтиёзлар ва преференцияларни қўллаш мақсадида ўзи ишлаб чиқарган товарларни (ишларни, хизматларни) аниқлаш қоидалари” (АВ 16.02.2011 й. 2195-сон билан рўйхатга олинган)га мувофиқ, маҳсулот, корхонанинг ўзи ишлаб чиқарган товар ҳисобланадиган ва ушбу корхона томонидан қайта ишлаш учун берилган хом ашёдан ишлаб чиқарилган ҳолларда, ўзи ишлаб чиқарган товар деб хом ашё мулкдори учун - қайта ишлаш натижасидан кейин олинган маҳсулот, қайта ишлаш хизматлари учун қайта ишланган маҳсулотнинг бир қисми билан ҳақ тўлаш ҳолларида эса, маҳсулотнинг қайта ишлаганлик учун ҳақ сифатида қайта ишловчи корхона тасарруфида қоладиган қисми чегириб ташланган ҳолдаги маҳсулот ҳисобланади.
Шундан келиб чиқиб, корхона Ягона солиқ тўловининг экспорт ҳажмидан келиб чиқиб пасайтириш имтиёзидан ЎзР Президентининг 22.12.2015й. ПҚ-2455-сонли Қарорининг 10-1-Иловасига кўра фойдаланишга ҳақли:
Ўзи ишлаб чиқарган товарлар экспорти сотишнинг умумий ҳажмида 15 фоиздан 30 фоизгача бўлса – белгиланган ставка 30%га пасайтирилади;
Ўзи ишлаб чиқарган товарлар экспорти сотишнинг умумий ҳажмида 30 фоиз ва ундан кўп бўлса – белгиланган ставка 50%га пасайтирилади.
Калава ипни давал хом ашёси сифатида қайта ишлашга бериш операцияси реализация сифатида қаралмайди. “Қайта ишлашга берилган хом ашё билан боғлиқ операцияларни бухгалтерия ҳисобида акс эттириш тартиби тўғрисидаги Низом” (15.03.2010й. 2086-сон билан рўйхатга олинган) га мувофиқ давал хом ашёси қайта ишловчига берилганда унинг қиймати балансдан ҳисобдан чиқарилмайди, балки 1070 "Четга қайта ишлаш учун берилган материаллар" счётида бошқа тегишли материалларни ҳисобга олувчи счётларда (1000) ҳисобга олинган қиймати бўйича ҳисобга олинади. Давал хом ашёсини қайта ишловчига бериш"Давал хом ашёсини қабул қилиш-топшириш далолатномаси" ёки "Давал хом ашёсини топшириш накладнойи" билан расмийлаштирилади. Мос равишда, калава ипни қайта ишлашга беришда ЯСТ бўйича солиққа тортилувчи объект юзага келмайди.
Жавоблар улар эълон қилинган санада долзарб ҳисобланади.