Йўқ, сизнинг корхонангиз мажбурий аудиторлик текширувидан ўтиши шарт эмас.

Ўзбекистон Республикасининг 26.05.2000 й. 78-II-сон "Аудиторлик фаолияти тўғрисида"ги Ўзбекистон Республикаси Қонунига мувофиқ акциядорлик жамиятлари, банклар ва бошқа кредит ташкилотлари, суғурта ташкилотлари, инвестиция фондлари ҳамда юридик ва жисмоний шахсларнинг маблағларини жамлаб турувчи бошқа фондлар ҳамда уларнинг инвестиция активларини ишончли бошқарувчилар, шунингдек устав фондида давлатга тегишли улуш бўлган хўжалик юритувчи субъектлар ва давлат унитар корхоналари, фонд ва товар биржалариҳар йили мажбурий аудиторлик текширувидан ўтишлари керак.

Давлат корхоналари тўғрисида Низом (ЎзР ВМ 16.10.2006 й. 215-сон қарорига 1-илова)га асосан давлат унитар корхонаси – бу тижорат ташкилоти бўлиб, муассиси давлат бошқарув органи, ушбу органлар мақомини белгилайдиган ҳужжатларга мувофиқ белгиланган уларнинг ваколати доирасида давлат корхонасини таъсис этишга вакил қилинган маҳаллий давлат ҳокимияти органлари бўлган ташкилотдир.

«Ўзбеккўмир» АЖ акционерлик компанияси бўлиб, у давлат бошқарув органи маҳаллий давлат ҳокимияти органларига кирмайди. Мос равишда, сизнинг корхонангиз давлат унитар корхонаси сифатида талқин этилмайди.

Ўзбекистон Республикасининг 31.10.1990 й. 152-XII-сон "Ўзбекистон Республикасида мулкчилик тўғрисида"ги Қонунининг 20 – моддасига мувофиқ

“Ўзбекистон Республикаси халқи давлат мулкининг субъектидир. Мулкий ҳуқуқни халқ номидан Ўзбекистон Республикаси Олий Мажлиси, Ўзбекистон Республикаси Президенти ва улар ваколат берган давлат бошқаруви органлари амалга оширади”

«Ўзбеккўмир» АЖ  давлат бошқаруви органи бўлмаганлиги сабабли сизнинг устав фондингиздаги унинг улуши давлат улуши ҳисобланмайди. Бу шуни англатадики, «Ўзбеккўмир» АЖнинг 100% улуши бўлган сизнинг унитар корхонангиз ўз устав капиталида давлат улушига эга корхона сифатида қаралмайди, бунда «Ўзбеккўмир» АЖнинг ўз устав капиталида давлат улуши бор ёки йўқлиги аҳамиятга эга эмас. Чунки мустақил юридик шахс ўз мулкига эгадир (Фуқаролик кодексининг 39-моддаси)

Шундай қилиб, корхонангизда давлат улуши бўлмаганлиги ва у давлат унитар корхоналарига кирмаганлиги учун сизнинг корхонангиз мажбурий аудиторлик текширувидан ўтиши шарт эмас.