Солиқ rодексининг 179-моддаси 1-бандига асосан, жисмоний шахсларнинг даромад солиғига тортилмайдиган моддий ёрдам рўйхати белиланган. Талабага берилган моддий ёрдам ушбу рўйхатга киритилмаган, шунинг учун ушбу ёрдам суммаси даромад солиғига тортилиши лозим.

Талаба учун ўқув-таълим муассасаси асосий иш жойи бўлиши ёки бўлмаслигига келадиган бўлсак, СК 22-моддасида кўрсатилганки, асосий иш жойи деганда – иш берувчи меҳнат тўғрисидаги қонун ҳужжатларига мувофиқ ходимнинг меҳнат дафтарчасини юритиши шарт бўлган иш жойи ҳисобланади.

Ўқув юрти билан талаба ўртасида муносабатлар меҳнат тўғрисидаги қонун ҳужжатларига мувофиқ тартибга солинмаслиги туфайли, ўқув юрти талаба учун иш жойи бўла олмайди.

Агар талаба ўқишдан ташқари мехнат шартномаси асосида ўкув юртида мехнат фаолиятини юритсагина, талаба учун ушбу ўқув юрти асосий иш жойи бўлиб ҳисобланиши мумкин.

Шундай экан, ушбу моддий ёрдам талаба учун асосий иш жойидан олинмаган даромад ҳисобланиб, асосий бўлмаган иш жойидан олган жисмоний шахсларнинг даромади тўғрисидаги ҳисоботда акс эттирилади.

Бундан келиб чиққан ҳолда, талаба жисмоний шахсларнинг жами йиллик даромади тўғрисидаги декларацияни топширишга мажбур. Агар унинг аризасига кўра белгиланган энг юқори ставка қўлланилган ҳолда даромад солиғи ушлаб қолинган бўлса, даромадлар тўғрисида декларация тақдим этилмайди (СКнинг 189-мод.).

Солиқ агенти асосий бўлмаган иш жойидан даромадлар олган жисмоний шахслар тўғрисида ДСҚ ва Молия вазирлиги томонидан белгиланадиган шаклда, солиқ даври тугаганидан сўнг 30 кун ичида давлат солиқ хизмати органига маълумотнома тақдим этиши шарт. Агарда жисмоний шахснинг ёзма аризаси асосида жисмоний шахслардан олинадиган даромад солиғи белгиланган энг юқори ставка солиққа солинган бўлса, унду ушбу маълумотнома тақдим этилмайди (СКнинг 187-мод.).