Корхонангиз хато келган пулларни пластик карта эгаларига қайтариши зарур. Уни даромад сифатида ўз ҳисобрақамида қолдиришга асос бўлувчи қонуний ҳужжат йўқ.
Корхона – ҳисоб рақам эгаси унга кўчирмалар берилганидан кейин 2 (икки) иш куни мобайнида банкка ҳисобварақ кредити ёки дебетига хато ёзилган суммалар ҳақида ёзма равишда хабар қилиши шарт (АВ томонидан 11.07.2008 й. 1834-сон билан рўйхатга олинган). Агар шу муддат ичида мижоз ўз эътирозини билдирмаса, бажарилган операциялар ҳамда ҳисобварақдаги маблағ қолдиғи тасдиқланган ҳисобланади.
Ушбу муддат давомида сиз банкка расман мурожаат этиб, пуллар хато келганини маълум қилишингиз мумкин. Банк мемориал ордер асосида хато келган маблағларни қайтаради. Ушбу муддат ўтган тақдирда пуллар тўлов топшириқномаси билан тўлов деталлари қисмида асос бўлувчи ҳужжат, шартномалар мавжуд эмаслиги кўрсатилган ҳолда корхона томонидан қайтарилиши зарур.
Жавоблар улар эълон қилинган санада долзарб ҳисобланади.