Солиқ кодексининг 91-моддаси 11-қисмига асосан солиқ текшируви текширув ўтказилаётган йилдан бевосита олдинги кўпи билан 5 календарь йилдаги фаолиятни қамраб олади.
Солиқ текшируви солиқ тўловчининг молия-хўжалик фаолияти текшируви (тафтиши) ва қисқа муддатли текширув шаклида амалга оширилади.
Текширув натижасида аниқланиши мумкин бўлган ҳуқуқбузарликлар ва жавобгарлик чоралари:
Солиққа оид ҳуқуқбузарликларнинг турлари | Жавобгарлик чоралари | Солиқ кодекси моддаси |
Кирим қилинмаган товарларни сақлаш ёхуд товарларни реализация қилишдан тушган тушумни яшириш (камайтириб кўрсатиш) [1] | кирим қилинмаган, яширилган (камайтириб кўрсатилган) товар қийматининг 20 фоизи миқдорида жарима |
|
Ҳисобварақ-фактураларни расмийлаштириш тартибини бузиш | ҳисобварақ-фактурада кўрсатилган ҚҚСнинг 20 фоизи миқдорида жарима | 118-модда |
Фискал хотирали назорат-касса машиналаридан ва тўловларни пластик карточкалар асосида қабул қилиш бўйича ҳисоб-китоб терминалларидан фойдаланиш тартибини бузиш | ЭКИҲнинг 30 бараваридан 50 бараваригача миқдорда жарима | 119-модда |
Солиқлар ва бошқа мажбурий тўловларни тўлаш муддатларини бузиш | муддати ўтказиб юборилган ҳар бир кун учун 0,033 фоиз миқдорида пеня | 120-модда |
Текшириш якунларига кўра ҳуқуқбузарлик аниқланган тақдирда солиқ органи қонун ҳужжатларига мувофиқ чоралар кўради. Бунда молиявий санкциялар жавобгарлик чораси бўлиб, пул ундириш (жарималар ва пеня) тарзида қўлланилади (СК 112-м., Солиқлар ва бошқа мажбурий тўловларга пеня ҳисоблаш тартиби тўғрисидаги низом (рўйхат рақами 1724, 09.10.2007 й.).
Солиқ органи пеня ва/ёки қўлланилган жарима суммаси ҳамда тўлаш муддатини кўрсатган ҳолда қарор чиқаради. Қарорда кўрсатилган муддатда (одатда, солиқ органи қарорининг кўчирма нусхаси олинган кундан эътиборан 30 кун ичида) ҳуқуқбузарликлар бартараф этилиб, ҳисобланган солиқлар, бошқа мажбурий тўловлар ва пеня суммаси тўланган тақдирда жавобгарликнинг жарима қисми бекор қилинган ҳисобланади (СК 104-м.). Мазкур норма товарларни реализация қилишдан олинган тушумни яшириш (камайтириш) ва кирим қилинмаган товарларни сақлаш (СК 114-м.), фискал хотирага эга бўлган назорат-касса машиналарининг қўлланилиш тартибини бузиш (СК 119-м.) ҳолларига татбиқ этилмайди.
Белгиланган муддатда ҳуқуқбузарлик бартараф этилмаган ҳамда ҳисобланган солиқлар, бошқа мажбурий тўловлар ва пеня [2] суммаси тўланмаган тақдирда, солиқ органи мажбурий равишда ундириш чораларини кўради, шунингдек жарима қўллаш тўғрисида даъво аризаси билан судга мурожаат қилади.
Суд ҳуқуқбузарнинг моддий аҳволини ва айбни енгиллаштирувчи ҳолатларни инобатга олиб, СК 17-бобида назарда тутилган молиявий санкциянинг энг кам даражасидан ҳам камроқ, бироқ белгиланган санкция энг кам миқдорининг 25%дан кам бўлмаган миқдорда молиявий санкция қўллашга ҳақли (СК 112-м.).
Юридик шахснинг ҳуқуқбузарлик учун жавобгарликка тортилиши тегишли асослар мавжуд бўлган тақдирда, унинг мансабдор шахсларини маъмурий, жиноий ва бошқа жавобгарликдан озод этмайди (СК 108-м. 5-қ., Олий суд Пленумининг 2013 йил 30 майдаги 8-сонли «Солиқлар ва бошқа мажбурий тўловларни тўлашдан бўйин товлаганлик учун жавобгарликка оид қонунчиликнинг судлар томонидан қўлланилиши тўғрисида»ги қарори 10-б. 2-хатбошиси).
[1] Яширилган (камайтириб кўрсатилган) суммага жаримадан ташқари солиқлар ва бошқа мажбурий тўловлар ҳам ҳисобланади (СК 114-м. 4-қ.).
[2] Пеня ундирилиши солиқ тўловчини солиқ мажбуриятларини бажаришдан озод қилмайди (СК 120-м.).
Жавоблар улар эълон қилинган санада долзарб ҳисобланади.
Телеграм канали 