МКнинг 100-моддаси 2-қисми 7-бандига асосан, ходимнинг пенсия ёшига тўлганлиги, қонун ҳужжатларига мувофиқ ёшга доир давлат пенсиясини олиш ҳуқуқи мавжуд бўлиши меҳнат шартномасини бекор қилишга асос бўлади. Бунда аҳамият бериш керакки, ходим нафақат пенсия ёшига тўлиши (аёллар учун - 55 ёш), балки унинг давлат пенсиясини олиш ҳуқуқи мавжуд бўлиши керак. Шу асосларга кўра аёлларни пенсия ёшига тўлгандан кейин иш берувчи ташаббуси билан меҳнат шартномасини бекор қилиш мумкин. Лекин 07.03.2019 й. ПҚ-4235-сонли Президент қарорининг 1 бандига биноан аёлларнинг пенсия ёшига тўлганлиги ёки ёшга доир давлат пенсиясини олиш ҳуқуқи вужудга келганлиги сабабли улар билан тузилган номуайян муддатли меҳнат шартномасини 60 ёшга тўлгунга қадар иш берувчининг ташаббусига кўра бекор қилиш тақиқланган. Меҳнат кодексига тегишли ўзгартиришлар киритилмаганлиги сабабли бугунги кунда иккита норматив-ҳуқуқий ҳужжат нормалари бир-бирига тўғри келмайди. Маълумки, Президент қарорига нисбатан кодекс юқорироқ юридик кучга эга. “Норматив-ҳуқуқий ҳужжатлар тўғрисида”ги Қонуннинг 16-моддасига асосан норматив-ҳуқуқий ҳужжатлар ўртасида тафовут бўлган тақдирда, юқори юридик кучга эга бўлган норматив-ҳуқуқий ҳужжат қўлланилади.

Бугунги кунда кодекснинг янги таҳрири тайёрланмоқда ва ушбу кодексда бундай тафовутлар бартараф этилган бўлади.

ПҚ-4235-сонли Президент қарори хотин-қизларнинг меҳнат ҳуқуқлари кафолатларини янада кучайтиришга қаратилганлигини инобатга олиб, бугунги кунда Президент қарорида белгиланган тартибга риоя этишни тавсия қиламиз.