2 ёшга тўлмаган боласи бор аёлларга, дам олиш ва овқатланиш учун бериладиган танаффусдан ташқари, болани овқатлантириш учун қўшимча танаффуслар ҳам берилади. Бу танаффуслар камида ҳар 3 соатда 30 минутдан кам бўлмаган муддат билан берилади. 2 ёшга тўлмаган 2 ва ундан ортиқ боласи бўлган тақдирда, танаффуснинг муддати камида 1 соат қилиб белгиланади. Бу танаффуслар иш ҳақи сақланган ҳолда иш вақтига киритилади. Аёлнинг хоҳишига кўра, болани овқатлантириш учун бериладиган танаффуслар дам олиш ва овқатланиш учун белгиланган танаффусга қўшиб берилиши ёки умумлаштирилиб, иш кунининг (иш сменасининг) бошига ёки охирига кўчирилиб, иш куни (иш сменаси) шунга яраша қисқартирилиши мумкин (Меҳнат кодекси 236-м.). Шунга кўра иш вақти давомида болани овқатлантириш учун қўшимча танаффуслардан фойдалана олмаган ходимнинг ишдан 1 соат олдин кетиш тўғрисидаги илтимоси иш берувчи томонидан қаноатлантирилиши керак. Шу 1 соатга бошқа ходим билан келишилиб, унга кассада ишлаш юклатилиши мумкин.