18.05.2007 йил ПФ-3878 сонли Президент Қарорининг 4 – бандига асосан, ёш оила аъзолари бўлган жисмоний шахсларнинг солиқ солинадиган даромадларининг шахсий уй-жой ёки кўп қаватли уйда хонадон қуриш, таъмирлаш ва сотиб олиш учун олинган ипотека кредитлари ва улар бўйича ҳисобланган фоизларни қоплаш учун йўналтирилган қисми даромад солиғига тортилмайди.

Мазкур Фармон татбиқ этиладиган ёш оила тоифасига, ҳар бири 30 ёшдан ошмаган, биринчи марта расмий никоҳдан ўтган ёшлар киради.

Агар Сиз ипотека кредити тўловини нақд пул билан ёки сизга тегишли бўлган пластик карта орқали амалга ошираётган бўлсангиз, ва бу шартлар банк билан тузилган шартномада кўрсатилган бўлса, унда имтиёзни қўллашни солиқ органи кўриб чиқади, бундай ҳуқуққа сиз ишлаётган корхона эга эмас.

Бунинг учун, Сиз яшаш жойингиз бўйича солиқ органига ҳисобот йилидан кейинги йилнинг 1 апрелидан кечикмасдан жами йиллик даромад тўғрисидаги декларация топширишингиз керак. Ипотека кредити тўловини амалга оширганлигингизни тасдиқловчи ҳужжатлар ҳам декларацияга қўшиб топширилади (СК 192 модда).