Биринчидан, хусусий корхона унинг тасисчиси – жисмоний шахсга (унинг ота-онасига) тегишли бўлган жойни ёки унинг бир қисмини фақат нотурар-жойга ўтказгандан кейингина у ерда фаолият олиб боришига рухсат берилади.

Ўзбекистон Республикаси Уй-жой кодексига асосан (9-моддаси) кўп квартирали уйлардаги турар жойларни саноат эҳтиёжлари учун ишлатиш, ижара ёки арендага бериш ман этилади. Кўп квартирали уйдаги турар жойга бошқа корхоналар, муассасалар ва ташкилотларни ушбу жой яшаш учун мўлжалланмаган жойлар туркумига белгиланган тартибда ўтказилганидан кейингина жойлаштириш мумкин.

Белгиланган тартибда касаначилик меҳнати амалга оширилаётган турар жойларни яшаш учун мўлжалланмаган жойлар тоифасига ўтказиш талаб этилмайди.

Иккинчидан, корхона ушбу турар-жойдан беғараз фойдаланганлиги натижасида келиб чиқадиган даромади унинг бошқа даромадлари таркибига киритилади. Текинга олинган мулкий ҳуқуқнинг қиймати бозор қийматида ҳисобланади (СК 135 – модда). Уй-жойдан текинга фойдаланиш, яъни ижара тўловисиз фойдаланишнинг бозор қиймати давлат томонидан белгиланган ижара ҳақининг минимал ставкаларидан келиб чиққан ҳолда ҳисобланади. 2017 йилда Тошкент шаҳрида нотурар жойни бир ойлик ижара ҳақининг энг кам ставкаси 1 кв.м. учун 9000 сўм қилиб белгиланган. Шунга қараб умумий ижара ҳақи ҳисобланиб, ушбу ижара ҳақи корхонанинг бошқа даромадларига киритилиши лозим.

Бошқа даромадлар корхонанинг қайси солиқ тизимидалигига қараб солиқ солинадиган базага қўшилади. Агар корхона умумбелигаланган солиқларни тўлайдиган бўлса, ушбу ҳисобланган ижара ҳақи унинг бошқа даромадларига киритилади ва фойда солиғига солинади (СКнинг 129-моддаси).

Агар корхона ЯСТда бўлса, унинг бошқа даромадлари асосий фаолияти учун ўрнатилган ЯСТ ставкаси бўйича солиққа тортилади (СКнинг 355-моддаси).

Шунингдек, бу ерда яна кўрсатиб ўтамизки, ЯСТнинг энг кам миқдорини  “Ягона солиқ тўловининг энг кам миқдорини ҳисоблаб чиқариш ва тўлаш тартиби тўғрисида”ги Низомга (АВ рўй. №2203 03.03.2011й.) мувофиқ ҳисоблашда, юқорида кўрсатилган турар-жойда корхона эгаллаган майдони инобатга олинган ҳолда ҳисобланиши лозим.