Ходим билан меҳнат шартномаси бекор қилинганида унга фойдаланилмаган барча йиллик асосий ва қўшимча таътиллар учун пуллик компенсация тўланади (МКнинг 151-моддаси). Ходим талаб қилмаган тақдирда ҳам иш берувчи корхона унга ушбу компенсация суммаларини барча йиллар учун тўлиқ миқдорда тўлаб беришга мажбур.

Ходимга барча фойдаланилмаган асосий ва қўшимча таътиллар учун компенсация тўлаш тўғрисида буйруқ чиқариш хамда ходимга ушбу суммаларни тўлаб бериш лозим.

Агар ходим фойдаланилмаган барча йиллик асосий ва қўшимча таътиллар учун пуллик компенсацияни тўлаб берилмаганлиги муносабати билан судга мурожаат қилса, суд томонидан унинг бу талаби тўлиқ қаноатлантирилади (МКнинг 275-моддаси 2-қисми). Сизнинг корхонангиз бундан ташқари яна суд ва почта харажатларини ҳам тўлаб беришга мажбур бўлади.

Шунингдек, корхонангизнинг мансабдор шахсига нисбатан меҳнат ва меҳнатни муҳофаза қилиш тўғрисидаги қонун ҳужжатларининг бузганлиги учун маъмурий жазо тайинланиши ва энг кам иш ҳақининг 2 бараваридан 5 бараваригача бўлган миқдорда жарима солиниши мумкин (МЖтКнинг 49-моддаси).

Айтиб ўтиш жоизки, ходимга фойдаланилмаган барча йиллик асосий ва қўшимча таътиллар учун пуллик компенсация суммаси меҳнатга ҳақ тўлаш тарзидаги даромад ҳисобланади (СКнинг 172-моддаси, 175-моддаси 1-банди, «а»-кичик банди). Меҳнатга ҳақ тўлаш тарзидаги даромадлар жисмоний шахсларнинг даромадларига солинадиган солиқ, ФЖБПТ, ЯИТ ва фуқароларнинг бюджетдан ташқари Пенсия жамғармасига суғурта бадаллари бўйича солиққа тортилади.