Фуқаролик-ҳуқуқий тусдаги шартнома меҳнат қонунчилиги билан тартибга солинмайди. Фуқаролик-ҳуқуқий тусдаги шартнома тузилганда томонлар орасида фуқаролик ҳуқуқий муносабатлари юзага келади. Яъни фуқаролик-ҳуқуқий тусдаги шартномага асосан буюртмачи ва ижрочи орасида бирон бир ишларни бажариш, хизматларни кўрсатиш бўйича шартнома тузилиб, унда бажарилган ишлар, хизматлар учун тўлов суммаси белгиланади. Шунинг учун  фуқаролик-ҳуқуқий тусдаги шартнома бўйича тўланадиган суммани меҳнат шартномаси бўйича тўланадиган иш ҳақига қўшимча иш ҳақи деб бўлмайди. Фуқаролик-ҳуқуқий тусдаги шартномада меҳнат шартномасига ўхшаб  иш ҳақи, иш ҳақига қўшимча тўлов ва шу каби иборалар ишлатилмайди. Юқорида айтиб ўтилгандек фуқаролик-ҳуқуқий тусдаги шартнома бўйича тўланадиган сумма алоҳида тўлов бўлиб, у меҳнат шартномаси бўйича тўланадиган иш ҳақига алоқаси йўқ. Корхонада меҳнат шартномаси бўйича ишлаётган ходим билан алоҳида бир марталик ишларни бажариш (хизматларни қўрсатиш) учун фуқаролик-ҳуқуқий тусдаги шартнома тузиб, у бўйича тўлов қилса бўлади.

Предмети ишларни бажариш ва хизматларни кўрсатишдан иборат бўлган фуқаролик-ҳуқуқий тусдаги шартномаларга мувофиқ жисмоний шахсларга тўловлар меҳнатга ҳақ тўлаш тарзидаги даромадлар жумласига киритилади (СК 371-м. 2-қ.).

Уларга ЖШДС, ЖБПҲга ажратмалар ва ижтимоий солиқ солинади. Солиқларни ҳисоблаш ва ушлаб қолиш мажбурияти тўловлар манбаи бўлган  ташкилотга юклатилади (СК 388-м., 403-м.).

Эслатиб ўтамиз, ходим билан иш берувчи ўртасидаги якка тартибдаги меҳнатга оид муносабатларни ҳақиқатда тартибга соладиган фуқаролик-ҳуқуқий хусусиятга эга шартномалар тузиш тақиқланади (МК 11-м. 3-қ.).